ACCESO A TODAS AS FOTOS DA GALA AQUÍ
Avigal anuncia a obra gañadora do II Certame Literario Jaime Olmedo Limeses
Avigal vén de anunciar a obra gañadora do II Certame Literario de Novela Infantil Jaime Olmedo Limeses, unha iniciativa impulsada pola compañía co obxectivo de promover a creación literaria en lingua galega e fomentar o hábito lector entre o público infantil. Nesta segunda edición do certame, á que se presentaron 40 novelas infantís, o xurado escolleu como gañadora a obra “ALÉN E O DRAGÓN”, da autora OLAIA SENDÓN, destacando a súa calidade literaria, a orixinalidade da proposta e a súa capacidade para conectar cos lectores máis novos.
O certame consolídase como unha das principais apostas culturais de Avigal, enmarcada no seu compromiso coa educación, a lingua galega e o apoio a novos talentos literarios. A obra premiada será publicada por Antela Editorial e presentada ao público durante a semana das Letras Galegas, nun acto que servirá para celebrar a creatividade e a literatura infantil en galego.
Como parte desta iniciativa, Avigal agasallará 1.500 exemplares da novela gañadora, que serán distribuídos en centros educativos e culturais de Galicia, contribuíndo activamente á difusión da lectura en galego e achegando a literatura aos máis novos.
Unha novela que conquistou ao xurado polo seu dinamismo, personaxes ben traballadas e referencias á cultura popular.
Na obra, ambientada en Sardiruña, un lugar onde nunca deixa de chover, Alén comeza a ter soños estraños con dragóns e vellas misteriosas. Cando descobre que esas visións poden ser reais, emprende unha aventura xunto á intrépida Nora que os levará a Leiras Longas, a aldea da súa familia, onde nada é o que parece. Entre segredos, poderes ocultos e humor, Alén deberá descubrir quen é… e que destino o agarda.
A autora, Olaia Sendón (Ourense, 1978) é licenciada en Comunicación Audiovisual pola UAB e profesora na Escola de Imaxe e Son da Coruña. É tamén autora de documentais e pezas de videoarte presentes en diferentes concursos e festivais. En Xerais ten publicados os álbums ilustrados «A crebeira Marabillas» (2021) e «A fotógrafa Perpetua» (2023). «Nave» (2024), a súa primeira novela, quedou finalista do XV Premio Jules Verne de Literatura Xuvenil. Coa novela «A Casa Grande» (2025), foi finalista do XLII Premio Xerais de Novela.
O xurado destacou tamén a gran calidade do conxunto das obras presentadas, subliñando o bo momento creativo que vive a literatura infantil en galego e o interese crecente por iniciativas que apoien este xénero.
Cómpre lembrar que o certame conta tamén cunha modalidade de relato infantil, dirixida a nenos e nenas menores de 12 anos con ganas de crear e contar a súa propia historia en galego. Na categoría de relato infantil escolar, o gañador é Matías Vázquez Rodríguez, do colexio Santa Teresa de Jesús-Carmelitas (Ourense), coa obra “O alento do cantil”.
A entrega do galardón de 3.000 euros e a presentación oficial da publicación terán lugar o Día das Letras Galegas, nun acto que se celebrará no Museo de Pontevedra e que contará coa presenza de representantes de Avigal, de Antela Editorial e da autora da obra premiada.
Xurado do certame: De esquerda a dereita. Xabier Domínguez (Presidente Antela Editorial), Alba De Evan (secretaria), Matilde Rodríguez (Representante de Avigal), Víctor Rivas, Xavier Estévez, Alba Blanco, Ivana Gómez.
MÁIS INFORMACIÓN EN: https://www.certameliterariojaimeolmedo.com/
Bases en pdf para descargar: AQUÍ
II CERTAME LITERARIO JAIME OLMEDO LIMESES
GALA DE ENTREGA DE PREMIOS
Bases en pdf para descargar: AQUÍ
XA TEMOS GAÑADOR!
Santiago de Compostela, 22 de marzo de 2025.
O Certame Literario de Novela Infantil Jaime Olmedo Limeses, promovido por Avigal en colaboración con Antela Editorial, xa ten gañador. Nesta primeira edición do premio, á que se presentaron 39 novelas infantís, o xurado escolleu a obra “Pernascochas”, do autor Ramón Domínguez Veiga, destacando a súa calidade e orixinalidade.
Dirixida a obra a un público infantil de entre 6 e 12 anos, o certame nace co obxectivo de fomentar a literatura infantil en galego e apoiar novos talentos. A obra gañadora será publicada por Antela Editorial e distribuída na semana das Letras Galegas. Ademais, Avigal agasallará 1.500 exemplares da novela, contribuíndo así á promoción da lectura en galego entre os máis novos.
Unha novela que conquistou ao xurado
“Pernascochas” é unha obra que conta a historia de Marcelina, unha nena peculiar. Marcelina proponlle a Martiño tres retos para que este poida conseguir a súa amizade: un que a sorprenda, outro que a faga rir e outro que a faga chorar como nunca antes chorara. O xurado salientou calidade literaria, orixinalidade, sensibilidade e o uso do humor.
O autor, Ramón D. Veiga, traballa no eido da edición, labor que compaxina coa escrita de textos de literatura infantil e xuvenil. Son da súa autoría obras como «Violeta quere ser vampiro». «Un conto do Samaín», «É tempo de Entroido», «Gloria» ou a serie de banda deseñada «Miñoca».
O xurado destacou a altísima calidade de todos os orixinais propostos.
A entrega dos 3000 euros de galardón e a presentación da publicación, terá lugar na semana das letras galegas, nun evento que contará coa presenza de representantes de Avigal, Antela Editorial e o gañador do mesmo.
Xurado do certame: De esquerda a dereita. Alba De Evan (secretaria), Miguel García, María Lado, Celia Fernández, Blanca Millán, Ramiro J. Peralta.